حياتي القلب بالأشواق طاير
وجالك من عظيم الشوق زاير
يبي قربك ولو كانت ثواني
بعد ما كان من فرقاك حاير
أنا معذور من روعة جمالك
تبارك من خلق سحر الحراير
جمالك ما رأت عيني مثيله
من البحرين لحدود الجزاير
شعر أسود يسر العين لونه
أبد ما شفت مثله بالضفاير
ووجهٍ تشرق الشمس بجبينه
ضحوكٍ باسمٍ مثل البشاير
وعيونٍ من معالمها كحيلة
ورموشٍ سود وأهداب نضاير
وأنفٍ جل من أبدع جماله
أحد وأمضي من سيوف شطاير
وخصرٍ ناحلٍ ماله مثايل
يشب بخافق الشاعر سعاير
وحديثك يا بعد عمري قصيدة
تريح القلب من هم وحساير
أحبك حب صادق في حياتي
غرامك صار في وسط الضماير
أنا لولاك ما دست الصعايب
وجيتك من عظيم الشوق زاير