يا من غلاها شدني صوبها شد

والقلب من بُد العذارى عشقها

ليش الزعل يا ناعم الخد والقد

ومحبتك بالقلب محدٍ حرقها

بيني وبينك محبةٍ ما لها حد

إن قلت وإن ما قالت محدٍ طرقها

وش جاك منّي يا لغضي تبدي الصد

وتزيد في نفسي بداية أرقها

أذكر زمانٍ فات يا أبيض الخد

واذكر قصايد تحترق في ورقها

ضحّيت لك من غير شرحٍ ولا عد

وكلمة أحبك لك لساني نطقها

واليوم يوم الباب ما بيننا أنسد

كل الجروح أسباب صدك فتقها

إن كان في قلبك باقي لحبنا وجد

نزف الجروح أرجوك توقف دفقها

ما أتوب عنّك قلتها لأجلك بجد

لو الشمس عنّها تخلاّ شفقها

والحب يا ... بيننا صار ينهد

وخايف تموت أحلامنا في غرقها

وكتبتها بالأمس واليوم للغد

مشاعرٍ ما يوم عنّك خنقها

ذكرى غرامٍ بيننا اليوم يشهد

محبةٍ ما أحدٍ سوانا اعتنقها

اللي درس دستورها يعرف القصد

محدٍ دخل ما بيننا واخترقها

إن كان ودّك بيننا الحب يمتد

قصة هوانا ترجمي في ورقها

لهذا السبب ناديت من شدني شد

محبتك بالقب محدٍ حرقها