يا قبر أنا ماني من الناس ناسيك

دايم على بالي خيالك وذكراك

يا قبر من بعد الغضى جيت عانيك

وأبكي على ترابك وأقبّل حصاياك

يا قبر لا تنسى ولا ني موصيك

تذكر زمانٍ فات لي صرت ويّاك

إن مت لا تنسى الذي ميتٍ فيك

واذكر عظامٍ باليه وسط مثواك

يا قبر أنا مريت قصدي أشاكيك

واسمع كلامٍ قلته اليوم بحماك

بأسباب .... جيت يا قبر أحاكيك

واللي جرى يا قبر ما ظن يخفاك

حبيتها والحب الله يكافيك

يقتل نفوس الناس بهموم دنياك

راحت وخلتني وحيدٍ حواليك

ما لي أمل يا غير أبكي لرؤياك

يا ليتها يا قبر يومٍ أناديك

تسمع صدى صوتٍ من الحب ناداك

ويا ليتها ترجع قبل ما اندفن فيك

وتشوف حالي يوم جيت أتمناك

من زود حزني دمعتي دوم تسقيك

ومثل المطر دمعي من العين يسقاك

يا قبر من .... دمعتي ما تكفيك

خلتني وراحت على الربع ذولاك

وما لي أمل يا غير روحي تناجيك

وكم عاشق مثلي من الشوق ناجاك

يا قبر صار القلب بالحيل يغليك

وأشوف روحي صارت اليوم تهواك

يا قبر لا تنسى الذي صار راعيك

خفف عذابك للذي حب لقياك

أنا بشعري قلت ودي ألاقيك

وأسكن بوسطك واحضن تراب شكواك

يا قبر أنا ماني ولو عشت ساليك

والقلب عيّا اليوم يا قبر يسلاك

وصيتي لي مت تذكر موصيك

الشاعر اللي بين الأبيات وصاك

إن شفت ..... لا تخفى خوافيك

عطها الحقيقة وكل ما صار ويّاك

أذكر ترى سلمان بالشعر منبيك

ومن بُد كل الناس يا قبر ينخاك

تذكر لها ما جرالي حواليك

حتى تجيلك كل ما حل طرياك

لولا غلاها ما ذكرتك ولا جيك

ولا كتبت الشعر من قلب حاكاك

عسى الزهر من كل نوعٍ يغطيك

ودموع كل الناس تسقي محياك

من شان لي من حل ذكر وطاريك

تشوف دمع الناس بالحيل غطّاك

وتأتي البلابل من بعيدٍ تعزيك

ويسمع عزاها كل من جاك عزّاك

يا قبر أنا ماني من الناس ناسيك

دايم على بالي خيالك وذكراك